"Үлкен дулыға" турнирлерінің 22 дүркін чемпионы және әлемнің экс-бірінші ракеткасы Рафаэль Надаль мансабындағы ең қиын қарсыластары туралы ойларын бөлісті.
Бұл туралы испаниялық теннисші La Gazzetta dello Sport газетіне берген сұхбатында айтты.
"Мен Роджер Федерер мен Новак Джоковичтің біреуін бөліп жарып айта алмаймын. Мансабым олармен тығыз байланысты болғандықтан олар шеберлігімді үнемі ұштап отырды. Әрине бір-бірімізбен көп ойнап титулдар үшін таластық. Бірақ осы екі ойыншының арқасында мен үлкен биіктерге жеттім деп айту әділетті. Мансабымыздың ұзаққа созылуына үлес қосып, бір-бірімізді демеп отырдық”, — деп келтіреді Надальдің сөзін La Gazzetta dello Sport.
Рафаэль Надаль 38 жасында қараша айының соңында Дэвис кубогына қатысқаннан кейін мансабын аяқтағанын жариялаған еді. Оның есебінде 22 "Үлкен Дулыға" атағы және ATP турнирлерінде 92 жеңіс бар. Олардың арасында грунтта рекордтық 63 трофей бар.
