Еркін күрестен әлем чемпионы Ризабек Айтмұханға 97 келіге орнығу үшін әлі көп еңбектену керек. Мұндай пікірді еркін күрестен Қазақстан командасының бас бапкері Мадияр Құрамысов айтты.
Бұл туралы Sportbugin.kz жазды.
"Ризабекке қазір көп жаттығу қажет. Күші жоқ екені сырттан-ақ көрініп тұр. Оған ауыр, қара жұмыс істеу керек. Темір көтеру керек. Кем дегенде, бір жыл бойы жалпы дене жаттығуын үзбеуі тиіс. Тауда жүгіруі қажет.
Ол қазір жаттығып жүр, бірақ жеңіл жаттығулар ғана. Тиіп-қашып жасайды. Оның үстіне, жеке бапкері өзінің әкесі болғандықтан, баласын көп жағдайда аяп қалады. Оған мықты бапкер керек.
Алайда, 97 келі оған әлі ауыр боп тұр. Егер бұл салмақта өзін мойындатамын десе, жиналу керек", — деді Құрамысов.
Айта кетелік, Ризабек Айтмұхан Амманда (Иордания) өткен Азия чемпионатында күміс жүлдегер атанды. Финалда ол жапониялық Араш Йошидаға есе жіберді.
