Хабаровск қаласында өтіп жатқан Константин Коротковты еске алуға арналған халықаралық турнирде ауыр салмақта рингке көтерілген Сағындық Тоғамбай қарсыласын еш мүмкіндік қалдырмай жеңді.
Ауыр салмақ (92 келіге дейін) санатындағы алғашқы айналымда Сағындық Тоғамбай ресейлік Егор Плоцынмен қолғап түйістірді. Үш раундқа созылған кездесуде төрешілер бірауыздан жеңісті қазақстандық боксшыға берді.
Айта кетерлігі, шешуші үшінші раундта Сағындық қарсыласын тұрып қалған нокдаунға жіберіп, оның басымдылығын толықтай көрсетті.
Сағындық Тоғамбай — 2022 жылғы Азия чемпионаты мен Азия ойындарының қола жүлдегері. Бұған дейін жастар арасында үш мәрте Азия чемпионы атанып, Әлем чемпионатында күміс медаль иеленді.
