
Жас та болса батылдығымен танылған Такер бұл жекпе-жекті 25 жасқа дейін өткізгісі келетінін айтты.
Орта салмақта өнер көрсететін америкалық боксшы Джахай Такер (14-1-1, 6 KO) қазіргі IBF және WBO әлем чемпионы Жәнібек Әлімханұлымен (17-0, 12 KO) жекпе-жек өткізгісі келетінін мәлімдеді.
22 жастағы америкалық талант өз амбициясын Tha Boxing Voice подкастында ашық жеткізді:
«Мен Жәнібекпен 24 немесе 25 жасқа толмай тұрып жұдырықтасқым келеді. Тіпті Қазақстанға барып, оның белбеулерін тартып алып, үйге қайтуға дайынмын», – деді Джахай Такер.
Такердің бұл мәлімдемесі қазақстандық жанкүйерлер арасында қызу талқыға түсті.
5 сәуірде Астанада өткен бокс кешінде Жәнібек Әлімханұлы франциялық Анауэль Нгамиссенгені (14-1, 9 KO) бесінші раундта нокаутпен жеңіп, IBF және WBO чемпиондық титулдарын сәтті қорғады. Осылайша, қазақстандық чемпион өз позициясын нықтап, орта салмақтағы ең қауіпті қарсыластардың бірі екенін тағы бір дәлелдеді.
Такердің ашық шақыруынан кейін бокс әлемі бұл кездесу расымен өтуі мүмкін бе деген сұраққа үңіле бастады. Екі боксшы да Top Rank құрамында болғандықтан, келіссөздерге жол ашық.