Орта салмақта өнер көрсететін қазақстандық кәсіпқой боксшы Данияр Елеусінов алдағы жекпе-жегіне АҚШ-та қызу дайындалып жатыр.
Елеусіновтің жаттығу лагері Пенсильвания штатының Питтсбург қаласында орналасқан. Ол өзінің Instagram парақшасында жаттығу сәттерінен фотосуреттер жариялап, дайындық барысы туралы қысқаша пікір білдірді:
“Жақсы жаттығу. Жұмыс жүріп жатыр”, — деп жазды боксшы.
Данияр Елеусіновтің жаттығулары әйгілі америкалық жаттықтырушы Том Янкеллоның залында өтіп жатыр. Бұл маман кезінде бірқатар әлем чемпиондарын дайындаған. Елеусіновтің бұл лагерьді таңдауы оның кәсіби мансабына тың серпін беруі мүмкін.
Бұған дейін хабарланғандай, қазақстандық Олимпиада чемпионы жаңа кәсіпқой бокс жобасымен келісімшартқа отырған. Бұл лиганы UFC президенті Дана Уайт пен Сауд Арабиясынан шыққан ықпалды инвестор Турки әл-Аш-Шейх құрған болатын. Турнирдің нақты форматы мен ауқымы әзірге толық жарияланбағанымен бұл жоба әлемдік бокс нарығында үлкен серпіліс тудыруы мүмкін.
Елеусіновтің жаңа лига аясындағы дебюттік жекпе-жегі әлі ресми түрде бекітілмеген.
