Жартылай ауыр салмақтағы бұрынғы UFC чемпионы, бразилиялық файтер Алекс Перейра кәсіби мансабын аяқтауға ниетті екенін ашық айтты. Ол ұйым басшылығына деген ренішін әлеуметтік желіде білдірді.
Алекс Перейра UFC тарапынан әділетсіздікке тап болғанын сезінуде. Ол нақты неге көңілі толмағанын ашып айтпаса да, ұйымның кейбір шешімдері оған ауыр тиген сыңайлы.
"Мен әрдайым UFC қоңырауларына жауап беріп келдім. Бірақ олар менімен ойнағысы келсе, олай да істейік. Мен ешқашан UFC туралы жаман айтқаным емес, бірақ жаңа естігенім мені қатты қынжылтты", — деп жазды Перейра өзінің Twitter парақшасында.
Перейра бұған дейін де мансабын аяқтау туралы ойланғанын жасырмайды. Алайда соңғы жағдай оның бұл шешімді нақты қабылдауына түрткі болуы мүмкін екенін меңзеді:
"Менде бұған дейін де мансапты тоқтату туралы ой болған. Енді мына жағдай шешуші фактор болуы ықтимал".
Еске салайық, наурыз айында Алекс Перейра жартылай ауыр салмақта Магомед Анкалаевпен жекпе-жек өткізіп, чемпиондық белбеуден айырылған болатын.
Қазір UFC бұл мәлімдемеге ресми жауап берген жоқ. Жанкүйерлердің арасында Перейраны қолдайтындар да, оны шешімінен бас тартуға шақыратындар да көп.
Алекс Перейра — UFC тарихындағы ең харизматикалық әрі қауіпті файтерлердің бірі. Оның мансабын аяқтауы ұйым үшін де, спорт сүйер қауым үшін де үлкен жоғалту болары сөзсіз.
