Орта салмақтағы WBC тұжырымы бойынша әлем чемпионы Карлос Адамес (24–1–1, 18 КО) мен қазақстандық кәсіпқой боксшы Мейірім Нұрсұлтанов (20–0, 11 КО) арасындағы титулдық кездесу 2025 жылдың жазында өтуі ықтимал.
Бұған дейін тараптар 6 мамырға дейін ортақ мәмілеге келуі тиіс еді. Алайда келіссөздер үдерісі күткендегіден ұзаққа созылып, нәтижесінде промоутерлік аукцион кейінге шегерілді.
WBC ұйымы тараптардың келісімге жақын екенін атап өтіп, келіссөздерге қосымша уақыт беруді жөн көрген. Келісімге қол жеткізілсе, жекпе-жек Premier Boxing Champions (PBC) промоутерлік компаниясы ұйымдастыратын жазғы кештердің бірінде өтуі мүмкін.
Егер келіссөздер сәтті аяқталса, бұл Нұрсұлтановтың чемпиондық белбеу үшін алғаш рет рингке шығуы болмақ. Ал Адамес үшін бұл атақты қорғауға арналған маңызды айқасқа айналады.
