Олимпиада чемпионы Елдос Сметов Grand Slam Astana турнирінің финалынан кейін қазақстандық дзюдошы Ғұсман Қырғызбаевпен кездесіп, спортшыны шын жүректен құттықтады.
Желіде жарияланған бейнежазбада Қырғызбаевты Қазақстан дзюдо федерациясының өкілдерімен бірге Сметовтің қарсы алып, иығынан қағып, бірнеше рет “Сұңқар!” деген жылы лебіз білдірген сәті көрсетілген.
66 келіге дейінгі салмақтағы финалдық кездесуде Ғұсман Қырғызбаев ресейлік Рамазан Абдулаевқа жол беріп, турнирдің күміс жүлдегері атанды. Бұл — оның жарты жылдық үзілістен кейінгі алғашқы жарысы.
Сметовтің шынайы қолдауы спортшының жеке қайсарлығын ғана емес, қазақстандық дзюдошылар арасындағы бауырмалдық пен спорттық рухтың биік екенін дәлелдеді.
Елдос Сметов секілді Олимпиада чемпионының Қырғызбаевқа қолдау білдіруі — жас спортшыларға үлкен мотивация. Бұл жағдай дзюдо жанкүйерлерін ғана емес, жалпы спортсүйер қауымды тәнті етті.
