Біріккен Араб Әмірліктерінің Фуджейра қаласында өтіп жатқан таеквондодан кадеттер арасындағы әлем чемпионатында Қазақстан құрамасы екінші алтын медальға ие болды.
+65 кг салмақ дәрежесінде сынға түскен Жантөре Сағынғали финалда Украина спортшысы Максим Шудженконы сенімді түрде ұтып, алтын медаль еншіледі. Бұл – Қазақстан құрамасының осы әлем біріншілігіндегі екінші жеңісі.
Чемпионаттың үшінші жарыс күнінде Қазақстан қоржыны тағы екі қола жүлдемен толықты. 47 кг салмақта Алла Цой, ал 51 кг салмақта Аида Гожалимова үздік үштікке енді.
Еске салайық, бұған дейін 61 кг салмақта Хамзаальпер Ромашкин әлем чемпионы атанды. Осылайша Қазақстан құрамасының қоржынында бүгінде екі алтын және екі қола жүлде бар.
Бұл жарысқа 80 елден 811 жас таеквондошы қатысуда. Турнир 14 мамырға дейін жалғасады.
