Қазақстандық кәсіпқой боксшы Бек Нұрмағанбет (14 жеңіс, 12 нокаут) өзінің келесі жекпе-жегінің нақты күнін жариялады.
Бек Нұрмағанбет 15-ші жекпе-жегіне дайындалып жатыр.
"Ассалаумағалейкүм, баршаңызға! Келесі жекпе-жек күнім белгілі болды. Бұйырса, 12 шілде күні рингке шығамын. Бұл менің 15-ші жекпе-жегім болмақ. Алла сәтін салсын. Үлкен мақсаттар мен үлкен жекпе-жектер алда", — деп жазды Бек өзінің Instagram парақшасында.
Айта кетейік, Нұрмағанбеттің жекпе-жегі 25 мамырда АҚШ-тың Калифорния штатында Сан-Диегодағы бокс кешінде өтуі тиіс еді. Оның қарсыласы Гондурас өкілі Карлос Фидель Гуйти Миранда (7 жеңіс, 2 жеңіліс, 3 нокаут) болуы керек еді. Бірақ қарсыласының денсаулығына байланысты кездесу өтпей қалды.
Бек Нұрмағанбет қазір әлемнің ең танымал боксшыларының бірі Сауль "Канело" Альварестің залында жаттығып жүр. Ол бірнеше рет "Канелоның" спарринг-серіктесі ретінде де өнер көрсеткен.
