"О, qazakh style!" — Финляндия құрамасын баптап жүрген қазақ жаттықтырушы не дейді?

Финляндия құрамасын басқаратын қазақстандық маман Асқар Сәрсенбаев Астанада өтетін бокстан әлем кубогы қарсаңында Olympic.kz тілшілеріне эксклюзив сұхбат беріп, Еуропадағы жұмысы, ұлттық стиль және жаттығу жүйесі туралы айтты.

Финляндияда қазақ боксының ізі бар

“Финляндияда жұмыс істеп жүргеніме бірнеше жыл болды. Мұнда қысқы спорт түрлері дамыған: хоккей, шаңғы, коньки. Бірақ жазғы спорт та назардан тыс емес. Олимпиадалық комитет, федерациялар, қалалық әкімдіктер де қолдау көрсетеді”, — дейді бапкер.

Асқар Сәрсенбаев фин спортшыларына кеңестік және қазақ бокс мектебінің үлгісін дарытып жүр. Жаттықтырушының айтуынша, бұл стиль бүгінде халықаралық турнирлерде танымал бола бастаған.

“Кейде шетелдік бапкерлер менің шәкірттеріме қарап: “Oh, qazakh style!” – деп таңдай қағады. Бұл – үлкен мақтаныш”, — дейді ол.

Бокс жолы қалай басталды?

• 1990 жылдардың соңында Санкт-Петербургте білім алып жүріп, Финляндияға барған;
• Сол жерде жаттығып, жарыстарда топ жарған;
• Кейін ұлттық құраманың сапында жарыстарға қатысып, жаттықтырушы ретінде ұсыныс алған.

Айта кетерлігі, Асқар Сәрсенбаев фин құрамасында өнер көрсету үшін азаматтық алмаған. Ол тек тұрақты тіркеуде болып, Федерацияға мүшелік еткені жеткілікті болған.

Финляндиядағы бокс жүйесінің ерекшелігі

• Ерлер мен әйелдер бөлек емес, біріккен ұлттық құрамамен жұмыс істейді;
• Жастар, жасөспірімдер, тіпті босқын балалармен де жұмыс жүргізіледі;
• Құрам құрамында иран, ирак, Ресей, Ауғанстан, Украина, Сомали елдерінен келген жас спортшылар да бар.

“Біздің залда бес тілде сөйлей аласың – бәрі түсінеді. Бұл да бокс мектебінің интернационалды дамуының белгісі”, — дейді Сәрсенбаев.

Нәтиже емес, үдеріс маңызды

Финляндияда бапкерден жоғары нәтиже талап етілмейді. Керісінше, сенім мен ұзақмерзімді даму басым:

“Олар жүйеге қарайды. Ең бастысы – процестің дұрыс ұйымдастырылуы. Қысым жоқ, тек сенім мен қолдау бар”, — дейді маман.

Қазақстанмен байланыс үзілмеген

• Жыл сайын отбасын жазда Қазақстанға жібереді;
• Өзі сирек келсе де, Астанадағы оқу-жаттығу жиындарына қатысып тұрады;
• Фин құрамасының атынан әлем кубогының қазақстандық кезеңіне екі боксшы әкелді. Жастардың екеуі әскерден арнайы сұралып алынған.