Америкалық Авиус Гриффин (17–1, 16 КО) өз мансабындағы алғашқы жеңілісін ауыр нокаутпен қабыл алды. Бұл жекпе-жек WBC тұжырымы бойынша АҚШ чемпиондық белдігі үшін өткен.
Жекпе-жек Калифорниядағы Honda Center аренасында өтті. Бірінші раундтарда жанкүйерлердің наразылығы байқалды. Қос боксшы да қауіптен сақтанып, аса белсенді қимыл жасамады. Алайда техникалық тұрғыдан Джулиан Родригес (24–1, 15 КО) жақсырақ көрінді.
Сегізінші раундта Авиус Гриффин қарсыласын нокдаунға түсіріп, жанкүйерлерді дүр сілкіндірді. Родригес клинч арқылы аман қалды. Бірақ тоғызыншы раундта өзі де қарсыласын састырып, шабуылды жалғастырмағанымен басымдығын көрсетті.
Шешуші сәт оныншы раундтың соңында келді. Финалдық гонгқа санаулы секунд қалғанда Джулиан Родригес шабуылға көшіп, Гриффинді ауыр соққымен нокаутқа жіберді. Төреші кездесуді тоқтатып, андердогтың жеңісін тіркеді.
Бұл Родригестің кәсіби мансабындағы 25-ші жеңісі болса, Гриффин үшін алғашқы әрі ауыр жеңіліс ретінде тарихта қалмақ.
