Елордадағы World Boxing кубогында қазақстандық боксшы Нұрбек Оралбай финалға жолдама алды.
80 келіге дейінгі салмақ дәрежесіндегі жартылай финалда Оралбай Түркия боксшысы Мерт Айбугаға қарсы шығуы тиіс болған. Бірақ Анадолы елінің өкілі жекпе-жектен бас тартқан. Осылайша Нұрбек ешқандай соққы алмастан финалға өтті.
Мерт Айбуга турнирді қола жүлдемен аяқтады, ал Нұрбек Оралбай енді алтын медаль үшін шешуші айқасқа шығады.
Нұрбек Париждегі 2024 жылғы Олимпиада ойындарының күміс жүлдегері, сондай-ақ 2023 жылғы әлем чемпионы. Бұл жетістіктер оның қазіргі формасының жоғары деңгейде екенін дәлелдейді.
Астанадағы турнир барысында Оралбай мықты қарсыластарды жолынан тайдырды. Алдымен ол әзербайжандық Мурад Аллахвердиевті, одан кейін үндістандық Лакшья Чахардан басым түсті.
