Күрестен Қазақстан құрамасы Афинада жасөспірімдер арасындағы әлем чемпионатында екінші мәрте алтын жүлдеге ілікті.
Қазақстандық балуан Мадхия Усманова қыздар арасындағы 57 келі салмақ дәрежесінде чемпион атанды. Афина (Грекия) қаласында өтіп жатқан жасөспірімдер арасындағы әлем біріншілігінде ол қарсылас шақ келтірмей, алтын медаль иегері атанды.
Финалдық белдесуде Усманова Үндістан өкілі Мониді 6:5 есебімен ұтты. Бұл — Қазақстан құрамасы үшін екінші алтын.
43 келіде белдескен тағы бір отандасымыз Інжу Бакқожа әлем біріншілігінің қола жүлдегері атанды.
Айта кетейік, бұған дейін грек-рим күресінен Жаңажол Қуанышбек Қазақстан құрамасына алғашқы алтын медаль сыйлаған еді.
