Екінші орта салмақтағы жеңілмеген қазақстандық боксшы Бек Нұрмағамбеттің салмақ дәрежесін ауыстыру жайлы айтқан пікірі көпшіліктің назарын аударды.
"Қазір мен екінші орта салмақта рейтинг жинап жүрмін. Бұл деңгейге жету үшін көп еңбек еттім. Сондықтан осы салмақтағы позициямнан бас тартқым келмейді. Жартылай ауыр салмаққа ауысу — бәрін қайта бастау деген сөз. Әзірге ондай жоспарым жоқ", — деді Бек Нұрмағамбет.
Жас болса да, Бек бірнеше жылдан бері әлемнің үздік боксшыларының бірі Сауль "Канело" Альварестің командасында жаттығып жүр. Ол — "Канелоның" тұрақты спарринг-серіктестерінің бірі.
Бектің кәсіби мансабын Альварестің бапкері әрі менеджері Эдди Рейносо басқарады.
Нұрмағамбет екінші орта салмақта 14 жекпе-жек өткізіп, барлығында жеңіске жетті. Оның ішінде 12 жеңісін мерзімінен бұрын аяқтаған. Алайда сарапшылардың пікірінше, оның қарсыластарының деңгейі әлі де жоғары бәсекелестікке жетпей тұр.
