Таиланд астанасы Бангкокта өтіп жатқан жастар мен 22 жасқа дейінгі боксшылар арасындағы Азия чемпионатында алғашқы Қазақстан - Өзбекстан жекпе-жегі өтті.
54 келіге дейінгі салмақта бақ сынаған Жәнел Имантаева мен өзбекстандық Муслима Тургунова 1/8 финалда бетпе-бет келді. Кездесу барысында жанкүйерлер күтпеген сәттерге куә болды.
Жекпе-жектің екінші раунды нағыз драмаға айналды. Алдымен Жәнел Имантаева қарсыласын тік тұрып есеп алуға мәжбүр етті (стенд-даун). Артынша Тургунова да Жәнелге дәл осындай жауап қайтарды.
Алайда соңғы сөз төрешілерге берілді. Үш раундтың қорытындысы бойынша қазақстандық боксшы жеңіске жетті.
1–11 тамыз аралығында өтіп жатқан бұл дода – World Boxing ұйымы аясында жастар мен U22 спортшылар үшін тұңғыш Азия чемпионаты. Турнирге құрлықтың таңдаулы жас боксшылары қатысып жатыр. Қазақстан құрамасы алғашқы күннен-ақ жүлдеге таласты қарқынды бастады.
