Таиландтың Бангкок қаласында өтіп жатқан құрлықтық додада ол жапон қарсыласын айқын басымдықпен жеңіп, төрешілердің бір ауызды шешімімен жеңіске жетті.
Таиландтың Бангкок қаласында өтіп жатқан бокстан Азия чемпионатында этникалық қазақ Саят Ілиясов жартылай финалға шығып, медальді қамтамасыз етті. Ол турнирде Өзбекстан құрамасы атынан өнер көрсетіп жатыр.
65 келі салмақ дәрежесінде сынға түскен Ілиясов жарыстың төртінші күнінде жапониялық Юсаку Мацухисамен жұдырықтасты. Жекпе-жек басынан-ақ Ілиясовтың басымдығымен өтті: жылдам қозғалыс, дәл соққылар мен техникада үстемдік оның мықтылығын көрсетті. Алғашқы екі раундтан кейін төрешілердің төртеуі 20:18 есебімен қазақ боксшыны алға шығарды, бір төреші тең есеп — 19:19 тіркеді.
Соңғы раундта Мацухиса шабуылға көшкенімен, Саят Ілиясов оны сауатты қарсы алып, соққылармен жазалады. Жекпе-жек біткенде төрешілер бір ауыздан жеңісті Ілиясовқа берді. Осылайша этникалық қазақ спортшы жартылай финалға шығып, кемінде қола жүлдені иеленетін болды.
