Каратэден Қазақстан құрамасы жасөспірімдер мен жастар арасындағы Азия чемпионатына қарқынды дайындық жүргізіп жатыр. Дүбірлі дода 5 қыркүйекте Қытайдың Шаогуань қаласында басталады.
Байрақты бәсекеде ел намысын 36 спортшы қорғайды. Олар үш жас санаты бойынша барлық салмақ дәрежесінде өнер көрсетеді. Ұлттық құраманы жасақтау үшін елде үш ірі рейтингілік турнир ұйымдастырылды. Солардың нәтижесінде үздік нәтиже көрсеткендер негізгі құрамға енді.
Қазір каратэшілер өз өңірлеріндегі жеке бапкерлерімен жаттығу жұмыстарын жүргізіп жатыр. Ал 17 тамыз күні Алматыда бас қосып, бірлескен оқу-жаттығу жиынын өткізеді. Бұл Азия чемпионаты алдындағы соңғы дайындық болмақ.
Федерация өкілдерінің айтуынша, Қазақстан каратэшілері жыл сайын Азия чемпионатында үздік үштікке еніп келеді. Биыл да сол биікті бағындыру – басты мақсат.
