Эдуард Базров UFC-дегі қазіргі басты жұлдыз ретінде испандық файтер Илия Топурияны атады. Оның айтуынша, Топурияның стилі, әмбебап техникасы мен жарқын жеңістері оны ұйымның ең танымал спортшысына айналдырды.
Атақты қазақстандық файтер Шавкат Рахмоновтың бапкері, DAR Team командасының жетекшісі Эдуард Базров UFC-дегі ең танымал және қызығушылыққа ие спортшы кім екенін айтты. Бұл туралы Betonmobile.ru хабарлады.
Базровтың пікірінше, қазіргі таңда ұйымдағы сөзсіз №1 жұлдыз – испандық жекпе-жекші Илия Топурия.
"Ол жекпе-жектерін өте әсерлі өткізеді, кездесулерді жарқын аяқтайды. Өзінің айрықша стилі, аурасы және есте қаларлық бейнесі бар. Күресе де алады, соққы жасай да алады, нокаутқа да жібереді, сабмишнмен де жеңеді. Қазір бүкіл MMA әлемі Топурияны талқылап жатыр, әлеуметтік желілерде де ол үнемі жаңалық тақырыбында", – деді бапкер.
Қазіргі таңда Илия Топурия салмақ дәрежесіне қарамастан, әлемдегі үздік жекпе-жек шеберлері рейтингінде бірінші орында тұр. Соңғы айқасында ол жеңіл салмақтағы UFC чемпиондығына қол жеткізді. Испан файтері титулдық кездесуде бразилиялық Чарльз Оливейраны бірінші раундта нокаутқа түсірген еді.
