АҚШ-тың танымал бокс менеджері Эгис Климас қазақстандық әлем чемпионы Жәнібек Әлімханұлының мансабындағы маңызды жоспарларын жария етті. Климастың айтуынша, Жәнібек алдымен орта салмақта барлық белдікті біріктіруді көздеп отыр, одан кейін суперорта салмаққа (Канелоның салмағы) көшуі мүмкін.
Қазір Жәнібек WBO және IBF нұсқалары бойынша орта салмақта әлем чемпионы. Оның негізгі мақсаты — WBA белбеуін иеленіп отырған кубалық Эрисланди Лара сияқты қалған чемпиондармен жекпе-жек өткізіп, барлық титулды біріктіру.
Климастың айтуынша, орта салмақта аты белгілі боксшылар аз:
“Орта салмақта аса көп үлкен есімдер жоқ. Лара бар, бірақ ол жасы келген WBA титулына ие. Жәнібек — ірі габаритті боксшы, ол екінші орта салмаққа көтеріле алады. Бірақ алдымен барлық белбеуді жинап алғысы келеді. Сосын ғана суперорта салмаққа өтеді”, — деді Эгис Климас 3 Knockdown Rule подкастында.
Жәнібек өзінің промоутері Top Rank және менеджері Климаспен бірге әлемнің абсолют чемпионы атануды көздеп отыр. Егер бұл жоспар жүзеге асса, ол суперорта салмақтағы мықтылардың, соның ішінде Сауль “Канело” Альварестің салмағына көтеріліп, жаңа белестерді бағындыруға кіріседі.
