UFC орта салмақтағы жаңа чемпионы Хамзат Чимаевты Біріккен Араб Әмірліктерінде салтанатты түрде қарсы алды.
UFC белбеуін иеленген соң, Хамзат Чимаев БАӘ-ге оралды. Жергілікті жанкүйерлер мен спорт шенеуніктері жаңа чемпионды ерекше қошеметпен күтіп алды.
Чимаев БАӘ атынан 2023 жылдың қазан айынан бері жекпе-жектерге шығып жүр. Ол бұл уақыт ішінде үш мықты қарсыласын – Камару Усманды, Роберт Уиттакерді және Дрикус дю Плессиді дәл осы елдің туы астында жеңді.
2025 жылдың қаңтар айының соңында Хамзат ресми түрде БАӘ азаматы атанды. Бұл шешімнен кейін ол тек спортшы ретінде емес, елдің толыққанды азаматы ретінде де тарихқа енді.
Чемпион БАӘ-ге ризашылығын білдіріп, өз эмоциясын айтты:
"Маған осындай әдемі елдің намысын қорғау – зор абырой әрі үлкен жауапкершілік. Мен тек спортшы ғана емес, осы мемлекеттің азаматы болғаныма қуаныштымын. Қолдау көрсеткені үшін БАӘ халқына алғыс айтамын. Бұл ел әрдайым менімен мақтанатындай бар күшімді саламын!" – деді Чимаев.
