Болгарияның Самоков қаласында грек-рим күресінен жасөспірімдер арасында U20 әлем чемпионаты өтіп жатыр.
82 келіге дейінгі салмақта белдескен қазақстандық Диас Сейітқалиев жарысты іріктеу кезеңінен бастады. Алғашқы белдесуде ол Грекия өкілі Эммануил Николаидисті 12:4 есебімен тізе бүктірді.
1/8 финалда хорватиялық Михаэл Лукашты 3:1 есебімен жеңді. Кейін ширек финалда Үндістан спортшысы Принцпен кездесіп, айқын басымдықпен – 9:0 есебімен ұтты.
Жартылай финалда Сейітқалиевтің қарсыласы жапониялық Тайзо Йошида болды. Қазақстандық балуан тағы да сенімді өнер көрсетіп, белдесуді 9:0 есебімен мерзімінен бұрын аяқтады.
Айта кетейік, Диас Сейітқалиев осыған дейін U20 жасөспірімдер арасында Азия чемпионы атанған. Енді ол әлем чемпионатының финалында алтын жүлде үшін күреседі.
