Қазақстандық боксшы Әли Ахмедов 5 қыркүйекте Алматыда рингке қайта шығып, танзаниялық Джозеф Майгвисиямен кездеседі.
Қазақстандық боксшы Әли Ахмедов (23-2, 17 КО) 5 қыркүйекте Алматыдағы Балуан Шолақ атындағы спорт сарайында рингке қайта оралады. Екінші орта салмақ өкілі танзаниялық Джозеф Майгвисиямен (14-4, 10 КО) жекпе-жек өткізіп, басты мақсаты — әлем чемпионы атану жолындағы кезекті қадамын жасауды көздеп отыр.
Бокс кешінің басты жекпе-жегінде өнер көрсететін Ахмедов қарсыласы жайлы көп ақпарат білмейтінін жасырмады. Дегенмен ол басты назарды бір нәрсеге ғана аударған — қайта жеңіс жолына түсу.
«Білетінім — ол жаман боксшы емес, жақсы рейтингтерде тұрған. Барлығы 5 қыркүйекте белгілі болады. Менің мақсатым — рингке қайта оралып, өз жолымды жалғастыру. Жоспар сол қалпында: әлем чемпионы атану және үлкен айқастарға, үлкен ареналарға шығу», – деді Ахмедов Sarbaz Podcast-ке берген сұхбатында.
Ахмедов үшін бұл айқастың маңызы ерекше. Себебі ол ақпан айында Астанада өткен соңғы жекпе-жекте поляк боксшысы Мацей Сулецкиден (33-4, 13 КО) күтпеген жерден мерзімінен бұрын жеңілген еді.
Бұл сәтсіздікке қарамастан, қазақстандық боксшы спорттық мансабындағы басты мақсатын өзгерткен жоқ. Ол жанкүйерлерге өзінің әлеуетін дәлелдеп, қайтадан чемпиондық белбеу жолына түсуге ниетті.
Әли Ахмедов үшін Алматыдағы кездесу — тек кезекті жекпе-жек емес, мансаптық жаңа белестің бастауы. Егер ол жеңіске жетсе, әлемдік аренаға қайта шығуға үлкен мүмкіндік алады.
