Бокстан британиялық шолушы Тейлор О’Хиггинс Ливерпульде World Boxing ұйымдастырған әлем чемпионатындағы бірнеше даулы төрешілік шешімдерді назарға алып, олардың көбі қазақстандық боксшылардың пайдасына шешілгенін атап өтті. Оның ойынша, бұл жағдай Геннадий Головкиннің ұйымдағы қызметімен байланысты деген күдік тудырады.
14 қыркүйекте аяқталған әлем біріншілігінде Қазақстан құрамасы 7 алтын, 1 күміс және 2 қола медаль жеңіп, жалпы 10 жүлде иеленді. Бұл жетістік Қазақстанды турнирдің басты жеңімпаздарының біріне айналдырды.
О’Хиггинс өз мақаласында былай деп жазды:
«Ливерпульде болған жағдай қарапайым қателіктен гөрі жүйелі проблеманы көрсетті. Кейбір даулы шешімдердің Қазақстанның пайдасына шыққаны күдік туғызбай қоймайды. Өйткені Геннадий Головкин — Қазақстан Ұлттық олимпиадалық комитетінің президенті ғана емес, сонымен қатар World Boxing-тің Олимпиадалық комиссиясын да басқарады. Әрине, бұл сәйкестік болуы мүмкін. Бірақ әуесқой бокстың тарихын ескерсек, мұндай жайт міндетті түрде сұрақ тудырады».
О’Хиггинс World Boxing әлі жаңа жолға түскенін және «балалық шақтағы аурулардан» құтыла алмай отырғанын айтты. Оның пікірінше, басты міндеттердің бірі – жанкүйерлердің сенімін қайтару мен төрешілер жұмысының әділдігін қамтамасыз ету:
«Президент Борис ван дер Ворст басқарған ұйым жақсы бастау алды. Дегенмен әуесқой бокстағы жемқорлық дәстүрін жою оңай емес. Соңғы чемпионат көрсеткендей, World Boxing-тің алдында әлі көп жұмыс тұр».
