Әуесқой бокста кадрлық ауыс-түйістер күтілуде. World Boxing ұйымының қазіргі президенті Борис ван дер Ворст екінші мерзімге кандидатурасын ұсынбайтынын мәлімдеді. Жаңа президентті сайлау қараша айында федерация конгресінде өтпек.
Ресми мәлімдемесінде нидерландтық басшы «шаршадым» дегенді алға тартты. Алайда британдық журналист Данкан Маккай (Zues Files) мәліметінше, шын мәнінде себеп әлдеқайда күрделі.
ХОК (Халықаралық Олимпиада комитеті) президентке сенімсіздік танытқан. Бұған күмәнді маркетингтік келісім және 2028 жылғы Олимпиадада бокс турнирін өткізу бойынша әлсіз кепілдіктер әсер еткен. Сонымен қатар, World Boxing құрамындағы кейбір ұлттық федерациялар да оның жұмысына қанағаттанбай отырғаны айтылуда.
Журналист Маккайдың дерегінше, бас фаворит – Геннадий Головкин. Ол қазіргі таңда ұйымның Олимпиадалық комиссиясын басқарады. Егер Головкин жеңіске жетсе, ол қазақстандық спорт тарихында тұңғыш рет халықаралық бокс федерациясын басқарған азамат атанбақ.
Әзірге ресми үміткерлер тізімі жарияланған жоқ. World Boxing оны регламентке сәйкес кейінірек ұсынады.
