Орта салмақта WBO және IBF нұсқалары бойынша әлем чемпионы Жәнібек Әлімханұлы өз дивизионындағы өзге белбеу иелеріне өткір үндеу жолдады.
Өз жазбасында Әлімханұлы біріккен жекпе-жекке шығудан қашқақтап жүрген чемпиондарды тағы да сынға алды.
«Чемпиондар, менің сендерді қуалап жүруге уақытым жоқ. Сендер боксты ұятқа қалдырып жатырсыңдар! Егер жекпе-жекке келіспесеңдер, онда белбеулерді неге сақтап жүрсіңдер? Бұл соншалықты қиын болады деп ойламап едім!», — деп жазды «Қазақ стилі» әлеуметтік желіде.
Еске сала кетсек, бұған дейін Жәнібек Әлімханұлының келесі жекпе-жегін WBC чемпионы Карлос Адамеспен өткізетіні туралы ақпарат тараған болатын. Алайда кейін тараптар арасындағы келіссөздердің тағы да тығырыққа тірелгені белгілі болды. Орта салмақтағы тағы бір белбеу — WBA — кубалық Эрисланди Лараның иелігінде.
Айта кетейік, Карлос Адамес биылғы жылы британдық Хамза Ширазға қарсы белбеуін қорғаған болатын. Жекпе-жек тең нәтижемен аяқталып, доминикандық чемпиондық атағын сақтап қалған еді.
Еске сала кетейік, соңғы жекпе-жегін Жәнібек 5 сәуірде Анауэль Нгамиссенгемен өткізген. Нәтижесінде қазақ боксшысы французды бесінші раундта техникалық нокаутпен жеңген еді.
