Мексикалық атақты боксшы Сауль «Канело» Альварес шынтағына операция жасатты.
ESPN дерегінше, қалпына келу мерзімі кемінде екі айға созылады. Ал «Канелоның» қайтадан рингке шығуы 12-15 аптадан ерте болмайды. Демек Альварес 2026 жылдың екінші тоқсанына дейін шаршы алаңға оралмайды.
35 жастағы Альварес (63-3-2) соңғы айқасында америкалық Теренс Кроуфордқа төрешілер шешімімен жеңілді. Бұл нәтижеден кейін мексикалық боксшы супер орта салмақтағы абсолютті әлем чемпионы атағын қорғай алмады.
Бұл – Альварестің соңғы жылдардағы үшінші ауыр операциясы. 2018 жылы оң тізесінен ота жасатса, 2022 жылы сол қолының сүйегіне хирургиялық ем қабылдаған. Енді шынтағындағы жарақат оның мансабына тағы бір елеулі сынақ болып отыр.
