Ол бұл сәтті өзінің мансабындағы ең ауыр кезең деп атады.
Қазақ боксшысы Балауса Мұздыман Париж Олимпиадасына бару мүмкіндігінен қалай айырылғанын ашық айтты. Ол бұл сәтті өзінің мансабындағы ең ауыр кезең деп атады. Бұрымды боксшының сөзі бойынша бәрі бір ғана спаррингтен басталған. Сол кездесуде жеңіске жеткен спортшы Қытайдағы лицензиялық турнирге баруға тиіс болған. Бұл туралы offside.kz хабарлады.
«Сол кезде ұлттық құраманың бірінші нөмірі Жайна Шекербекова болатын. Ол екі лицензиялық турнирге қатысқанымен, жолдама ала алмады. Үшінші турнир алдында бізге “кім спаррингте жеңсе, сол Қытайға барады” деді», — дейді Мұздыман.
Балауса 54 келі салмақ дәрежесінде Шекербековамен жекпе-жекке шықты, бірақ нәтижесінде жеңіліп қалды.
«Мен сол кезде Жайнадан ұтылдым. Сөйтіп, Олимпиадаға бару арманымнан бас тартуға тура келді», — деп еске алады ол.
Балауса бұл шешім өзін моральдық тұрғыда қатты қажытқанын жасырмады.
«Әрине, өкінемін. Бұл менің мансабымдағы ең ауыр сәт болды. Отбасыма бәрін айта алмадым, тек бапкерім ғана менің жағдайымды түсінді. Ол мені қолдап, қайта тұруға көмектесті», — деді спортшы.
Осы жағдайдан кейін Балауса ұлттық құрамадан кетіп, жаңа жол таңдады. 2023 жылы ол кәсіби боксқа ауысып, жаңа белес бастады.
