Жапониядағы бокс кешінде бұрынғы әлем чемпионы Карлос Куадрас ауыр нокаутқа түсіп, карьерасын аяқтайтынын мәлімдеді. 37 жастағы мексикалықты кәсіпқой бокстағы бар-жоғы үшінші жекпе-жегін өткізген жапондық Томое Цубои тоқтатты.
52,2 келіге дейінгі екінші жеңіл салмақта (super flyweight) WBC нұсқасы бойынша бұрынғы әлем чемпионы Карлос Куадрас (44-6-1, 28 KO) карьерасын аяқтайтынын жариялады.
Ол Токиода өткен бокс кешінде жергілікті талант, әзірге жеңілмеген жапондық Томое Цубоимен (3-0, 2 KO) қолғап түйістірді. Куадрас тәжірибесіне қарамастан қарсылағына лайық қарсылық көрсете алмады. Жекпе-жек сегізінші раундта мерзімінен бұрын тоқтатылып, мексикалық ауыр жеңіліске ұшырады.
Осыдан кейін Карлос көп ойланбай, нүкте қоятын уақыт келгенін айтты.
«Бұл – менің соңғы жекпе-жегім, – деді Куадрас кездесуден кейінгі баспасөз мәслихатында. – Осы жекпе-жекке дайындық басталған сәттен-ақ, егер жеңілсем, карьерамды аяқтаймын деп шешіп қойғанмын. Бүгінгі қарсыласым керемет жұдырықтасты, мен бұл жеңілісті кішіпейілдікпен қабылдаймын».
Карлос Куадрас кәсіпқой рингке 2008 жылы қадам басты. 2014 жылы Таиланд боксшысы Срисакет Сор Рунгвисайды жеңіп, WBC әлем чемпионы атанды.
Кейін белбеуін қатарынан алты рет сәтті қорғап шықты. Алайда атағын сақтап қалу көпке созылмады – титулды кейінірек атақты никарагуалық Роман Гонсалеске беріп қойды.
Куадрас WBC чемпионы тәжін қайтаруға екі рет талпынып көрді, бірақ екеуі де сәтсіз аяқталды:
Томое Цубоиден жеңілердің алдында Карлос Куадрас алты жекпе-жектен тұратын жеңістік серияда келе жатты. Ол 2023 жылдың қарашасында WBC нұсқасы бойынша «уақытша» әлем чемпионы атағын иеленіп, мансабын қайта жандандыра түскендей болған.
