IBA (Халықаралық бокс қауымдастығы) 2025 жылғы әлем чемпионатындағы (Дубай, БАӘ) Всеволод Шумков (Ресей) — Абдумалик Халоков (Өзбекстан) арасындағы 60 келідегі финалға қатысты резонанс тудырған эпизодты қарап, жекпе-жек нәтижесін өзгеріссіз қалдыру туралы ресми мәлімдеме жасады.
IBA түсіндіруінше, даулы сәт үшінші раундтың аяқталуына шамамен 50 секундтай уақыт қалғанда болған. Жақын қашықтықтағы клинч кезінде көк бұрыштағы Шумковтың аузы қызыл бұрыштағы Халоковтың құлағына тиіп кеткені айтылған. Ұйым бұл әрекет кездейсоқ көрінгенін және айқас барысына елеулі әсер етпегенін атап өтеді.
Рефери эпизодқа өте жақын тұрған, жағдайды толық бақылаған және араласуды қажет емес деп шешкен. Кейінгі видео-қаралым да айқастың дұрыс жалғасқанын көрсеткені айтылады: Халоков бірден жекпе-жекті жалғастырып, жарақат белгісін танытпаған әрі қарсылық білдірмеген.
IBA мәлімдемесінде мұндай байланыс ереже бойынша тыйым салынатыны ескертіледі. Бірақ ресми тұлғалар әрбір жағдайды нақты уақыт режимінде және толық контекстпен бағалауы тиіс: әрекеттің ауырлығы, әдейілігі және жекпе-жекке ықпалы есепке алынады.
Осы жағдайда төрешілер бригадасының шешімі техникалық делегат тарапынан да расталған. Сонымен қатар ұйым өкілдері турнир аяқталғанға дейін Өзбекстан делегациясынан ресми апелляция түспегенін, сол себепті нәтижені өзгертуге немесе медальдарды қайта бөлуге регламенттік негіз жоқ екенін алға тартты.
Айқастың ашықтығын сақтау үшін дау тудырған сәт BIIU — бокста адалдықты қамтамасыз ететін тәуелсіз бөлімше тарапынан да қаралатыны көрсетілген. Егер ереже бұзушылық дәлелденсе, қаржылық айыппұл салу мәселесі талқылануы мүмкін.
Айта кетейік, 60 келідегі финалда Шумков өзбекстандық олимпиада чемпионы Абдумалик Халоковты төрешілердің бөлінген шешімімен жеңген. Жекпе-жектен кейін ресейлік боксшының айқас үстінде қарсыласын құлағынан тістеп алғаны туралы ақпарат тараған. Бұл Өзбекстанда үлкен наразылық тудырып, IBA президенті Умар Кремлевке жүгіну және нәтижені қайта қарау талаптарының айтылуына себеп болған. Кейін тексеріс жүргізу үшін комиссия құрылатыны хабарланған.
