Күрестен Қазақстан әйелдер құрамасы Албаниядағы Мухамет Малоны еске алу халықаралық турнирінде жүлде қорын толықтыруда.
55 келіге дейінгі салмақ дәрежесіндегі финалдық белдесуде Лаура Әлмағамбетова украиналық Лилия Маланчукты 3:2 есебімен жеңіп, турнир чемпионы атанды.
Әлмағамбетова шешуші белдесуге дейін күндізгі сессияда екі қарсыласынан басым түсті. Әуелі үндістандық Пушпаны — 3:1, кейін германиялық Анастасия Блайвасты — 6:1 есебімен тізе бүктірді.
Осылайша қазақстандық балуан финалға сенімді түрде жетіп, алтын медальді еншіледі.
Айта кетейік, бұған дейін дәл осы турнирде Қазақстан құрамасына алғашқы чемпиондықты 50 келіге дейінгі салмақта Зейнеп Баянова сыйлаған. Лаура Әлмағамбетованың жеңісі — Қазақстанның бұл жарыстағы екінші алтыны.
Мухамет Мало мемориалы 1 наурызға дейін жалғасады. Дәстүрлі халықаралық додаға әлемнің әр түкпірінен 500-ге жуық балуан қатысуда.
