UFC жауынгері Асу Алмабаев әлеуметтік желідегі жаңа жазбасымен жанкүйерлердің қызығушылығын оятты.
Қазақстандық аралас жекпе-жек шебері, UFC файтері Асу Алмабаев өзінің Instagram парақшасында көпшіліктің назарын аударған жазба жариялады.
Спортшы ұшақтан түсіп келе жатқан сәтін видеоға түсіріп, жазбаның астына: “Жақында жақсы жаңалық болады” деген қысқа ғана сипаттама қалдырған.
Бұл жазба жанкүйерлер арасында қызу талқыланып, көпшілік Алмабаевтың UFC-дегі келесі қадамына қатысты түрлі болжам айта бастады.
Еске салсақ, Асу Алмабаев 1 наурызда Мексиканың Мехико қаласындағы UFC турнирінде октагонға шығуы тиіс еді. Бірақ жекпе-жекке шамамен бір ай қалғанда қолынан жарақат алып, жоспарланған айқастан бас тартуға мәжбүр болды.
Ол осы кеште мексикалық танымал файтер Брэндон Мореномен жұдырықтасуы керек болған.
Алмабаев жекпе-жектен шығып қалғаннан кейін Брэндон Морено басқа қарсыласпен кездесті. Оның орнына англиялық файтер Лонир Кавана шықты.
Бұл кездесуде Морено төрешілердің бірауыздан қабылдаған шешімімен жеңіліп, жанкүйерлер үшін күтпеген нәтиже тіркелді.
Ал қазақстандық файтердің соңғы айқасы өткен жылдың қараша айында өтті. Сол кездесуде Асу Алмабаев америкалық Алекс Пересті үшінші раундта сабмишн әдісімен жеңіп, өз мүмкіндігін тағы бір мәрте дәлелдеген.
