Нью-Йорктегі қазақ Өзбекстанда титул үшін жұдырықтасады
Қазақстан тумасы, АҚШ-та өнер көрсетіп жүрген боксшы Димаш Ниязов Өзбекстанда ірі жекпе-жекте рингке шығады.
Ташкенттегі титул үшін жекпе-жек
Ресми мәліметке сәйкес, Ниязов Hype Fight ұйымының чемпиондық белбеуі үшін жұдырықтасады. Жекпе-жек 17 тамыз күні Ташкенттегі "Хумо Аренада" өтеді және кештің басты оқиғасы болады.
Қарсыласы — әлемге танымал америкалық стример әрі блогер Даррен Уоткинс. Айқас жартылай орта салмақта бокс ережесі бойынша өтеді.
Жылдамдық пен найзағай шайқасы
Жекпе-жекке қатысты ұйымдастырушылар оны ерекше қарсыласу ретінде сипаттауда:
"Бұл — жылдамдық пен найзағай текетіресі. Дәлдік пен агрессия. Рингтен біреуі ғана чемпион белбеуімен кетеді".
Ұйымдастырушылар бұл кешті тек спорттық оқиға емес, әлемдік жекпе-жек индустриясына әсер ететін шоу ретінде бағалап отыр.
Димаш Ниязов кім?
Димаш Ниязов — Шымкентте туған, бүгінде Нью-Йоркте тұратын кәсіби боксшы. Ол тек спортпен емес, қоғамдық қызметімен де танымал. Нью-Йорк полициясында қызмет етеді. 2017 жылы қаланың үздік полицейі атанған
Кәсіби рекорды: 14 жеңіс, 1 жеңіліс, 3 тең нәтиже. Сонымен қатар Бүкіләлемдік бокс кеңесі (WBC) оған қоғамға қосқан үлесі үшін "Әлем қаһарманы" атағын берген.