Бокстан Қазақстанның үш бірдей әлем чемпионы АҚШ-қа келді (ВИДЕО)

Боксшылар Лос-Анджелеске ұшып барды

Бұл туралы Америка Құрама Штаттарында тұратын қазақстандық блогер Айдана Тұрсын әлеуметтік желідегі парақшасында хабарлады. Ол Instagram сторисінде Лос-Анджелес әуежайына қонған ұшақтың видеосын жариялап, қазақстандық боксшыларды қарсы алғанын жазды.

"Менің қыздарым келді. Алуа Балқыбекова, Назым Қызайбай, Аида Әбікеева, қош келдіңіздер!" — деп жазды Айдана Тұрсын.

АҚШ-тағы жиын Азиадаға дайындықтың бір бөлігі

Бұған дейін Қазақстан әйелдер құрамасының бас бапкері Елдос Сайдалин команда 2026 жылы Жапонияда өтетін Азия ойындарына дайындық аясында АҚШ-та бір айлық халықаралық оқу-жаттығу жиынын өткізетінін айтқан. 

Бірақ соңғы уақытқа дейін Америкаға аттанатын құрам нақты жарияланбаған. Енді Лос-Анджелеске барған боксшылардың қатарында ұлттық құраманың ең тәжірибелі әрі титулды боксшылары бар екені белгілі болды.

Айта кетейік, Лос-Анджелесте белгілі америкалық маман Кристофер Камачо жұмыс істейді. Ол бауыры Дарио Камачомен бірге бұған дейін Қазақстан бокс құрамаларын маңызды халықаралық жарыстарға дайындауға атсалысқан.