Қазақстандық боксшы вьетнамдық қарсыласын үшінші раундта құлатты (ВИДЕО)
Қазақстан құрамасының U-19 санатындағы өкілі Мадира Жұмақан Джакартада бокстан жастар арасындағы Азия чемпионатында жарқын жеңіске жетті.
Жартылай финалға шықты
Мадира Жұмақан ширек финалда Вьетнам өкілі Тхи Хонг Йен Нгуенмен кездесті. 48 келіге дейінгі салмақта өткен жекпе-жекте қазақ қызы айқын басымдық танытты. Мадира алғашқы раундтардан бастап қарсыласына қысым жасап, соққыларын дәл тигізе білді. Нәтижесінде үшінші раундта төреші кездесуді тоқтатып, Жұмақан техникалық нокаутпен жеңіске жетті.
Бұл жеңіс Мадира Жұмақанға Азия чемпионатының жартылай финалына жолдама сыйлады. Бокс ережесіне сәйкес жартылай финалға шыққандар кемінде қола медальге ие болады.
Азия чемпионаты 16 шілдеге дейін жалғасады
Бокстан U-19 және U-23 арасындағы Азия чемпионаты Джакарта қаласында өтіп жатыр. Турнир 16 шілдеге дейін жалғасады.
Жарысқа Азияның 26 елінен 400-ден астам боксшы қатысуда. Қазақстан құрамасы бұл додада бірнеше салмақ дәрежесінде медаль үшін күресіп жатыр.