Қазақстандық балуандарға 100 мың доллар сыйақы беріледі

Жүлдегерлерге қанша төленеді?

Қазақстан күрес федерациясы бас хатшысының міндетін атқарушы Гүлбарам Құлахметованың айтуынша, ересектер арасындағы Азия және әлем чемпионаттарының жүлдегерлеріне арнайы ақшалай сыйақы бекітілген.

Астанада өтетін әлем чемпионатында:

• алтын медаль үшін — 100 мың доллар;
• күміс медаль үшін — 50 мың доллар;
• қола медаль үшін — 25 мың доллар төленеді.

Қосымша сыйақы туралы

Олимпиадалық спорт түрлері бойынша әлем чемпионатында жүлде алған қазақстандықтарға заңнамаға сәйкес мемлекеттік сыйақы да төленеді.

Әлем чемпионатындағы нәтиже үшін мемлекеттік төлем мөлшері:

• алтын медаль — 15 мың доллар;
• күміс медаль — 10 мың доллар;
• қола медаль — 5 мың доллар.

Осылайша егер федерация мен мемлекеттік сыйақы бірге есептелсе, әлем чемпионы атанған қазақстандық балуан жалпы 115 мың долларға дейін табыс табуы мүмкін.

Қазақстан құрамасының нақты құрамы қашан бекітіледі? 

Баспасөз мәслихатында Астанадағы әлем чемпионатына қатысатын Қазақстан құрамасының құрамы да сөз болды.

Биылғы әлем чемпионаты мен Азия ойындарының арасы тым жақын. Азия ойындары 19 қыркүйек пен 4 қазан аралығында, ал күрестен әлем чемпионаты 24 қазан мен 1 қараша аралығында өтеді.

Қазақстан күрес федерациясының төрағасы Еркін Оқасов қазір нақты құрамды атауға әлі ерте екенін айтты.

"Қазір кімнің қатысатынын айтуға ерте. Бізде жаттықтырушылар кеңесі бар. Қай балуанның қай жарысқа қатысуға лайық екенін солар шешеді", — деді федерация басшысы.

Азия ойындарында күрестің әр түрінен алты салмақ дәрежесі, ал әлем чемпионатында он салмақ санаты бойынша жүлделер сарапқа салынады.

Үш әлем чемпионы бар

Қазір күрестен Қазақстан құрамасында әлем чемпионы атанған үш балуан бар.

Грек-рим күресінен Айдос Сұлтанғали, ал еркін күрестен Ризабек Айтмұқан мен Нұрқожа Қайпанов әлем біріншілігінің алтын жүлдесін жеңіп алған. Олардың Астанадағы әлем чемпионатына қатысу-қатыспауы жаттықтырушылар штабының шешімінен кейін белгілі болады.

Бастапқыда 2026 жылғы күрестен әлем чемпионатын Бахрейннің Манама қаласында өткізу жоспарланған еді. Кейін Біріккен күрес әлемі (UWW) мен Бахрейн күрес федерациясы турнирді басқа елге ауыстыру туралы шешім қабылдады.

Нәтижесінде әлем чемпионатын қабылдау құқығына Астана ие болды. Қазақстан астанасы бұл бәсекеде Бішкектен басым түсті.

Әлемдік дода "Барыс Аренада" өтеді. Турнир 2026 жылғы 24 қазан мен 1 қараша аралығына жоспарланған.