Әлімханұлы Ширазбен жекпе-жек бойынша соңғы шешімін қабылдады

Қазақстандық боксшы Жәнібек Әлімханұлы WBO тұжырымы бойынша екінші орта салмақтағы әлем чемпионы Хамза Ширазға қарсы міндетті титулдық жекпе-жек өткізуге ресми түрде келісті.

Бұл туралы WBO президенті Густаво Оливьери 16 қыркүйекте өткен промоутерлік саудадан кейін мәлімдеді.

Top Rank WBO-ға ресми хат жолдады

Оливьери әлеуметтік желідегі жазбасында Жәнібек Әлімханұлының мүддесін қорғайтын Top Rank компаниясы ұйымға жазбаша түрде ресми хабарлама жібергенін айтты.

Оның сөзінше, қазақстандық боксшы промоутерлік сауда шарттарына сәйкес Хамза Ширазбен чемпиондық жекпе-жек өткізуге дайын және кездесуге қатысуға мүмкіндігі бар екенін растаған.

Жекпе-жектің өтуі үшін енді Хамза Шираз тарапы да дәл осындай ресми растау жіберуі керек.

Егер британиялық боксшы кездесуге келіссе, айқас WBO нұсқасы бойынша екінші орта салмақтағы әлем чемпионы атағы үшін өтеді.

Промоутерлік саудада Queensberry жеңген

16 қыркүйекте өткен промоутерлік саудада Queensberry Promotions ең жоғары ұсыныс жасады.

Фрэнк Уоррен басқаратын компания 1 001 809 доллар ұсынса, Top Rank-тің өтінімі 820 мың доллар болды.

Сол себепті жекпе-жекті ұйымдастыру құқығы Queensberry Promotions компаниясына өтті.

Жекпе-жек қашан және қайда өтуі мүмкін?

Алдын ала ақпарат бойынша, Әлімханұлы – Шираз кездесуі 28 қарашада немесе 5 желтоқсанда өтуі мүмкін.

Жекпе-жекті өткізуге ықтимал қалалар ретінде:

• Лондон;
• Бирмингем;
• Нью-Йорк қарастырылып жатыр.