Әлем чемпионынан жеңілген отандасымыз Загребте қайтадан жүлдеге таласады
Дзюдошы Есмігүл Құйылова Хорватия астанасындағы Гран-при турнирінде қола жүлде үшін белдесуге мүмкіндік алды.
Қола медаль үшін күрес
Қазақстандық дзюдошы 63 келіге дейінгі салмақ дәрежесінің жұбаныш кезеңінде венгриялық Бригитта Варгамен кездесіп, қарсыласынан басым түсті.
Осы жеңістің арқасында Құйылова қола медаль үшін өтетін белдесуге жолдама алды. Енді ол негізгі турнирдің жартылай финалында жеңіліс тапқан дзюдошылардың бірімен күш сынасады.
Загреб Гран-приінің екінші жарыс күніндегі финалдық белдесулер 14 қарашада Астана уақытымен сағат 21:00-де басталады.
Әлем чемпионына есе жіберген
Есмігүл Құйылова Загребтегі жарысты сенімді бастаған. Ол алғашқы белдесуінде америкалық Сара Голденді жеңсе, келесі айналымда Польшадан келген Наталья Кропскаядан басым түсті.
Ал ширек финалда қазақстандық татами шебері 2021 жылғы әлем чемпионы, канадалық Джессика Климкайтпен кездесті. Тартысты өткен белдесуде Құйылова қарсыласына жол беріп, жарысты жұбаныш кезеңінде жалғастыруға мәжбүр болды.
Соған қарамастан отандасымыз венгриялық қарсыласын жеңіп, жүлделі орынға таласу мүмкіндігін сақтап қалды.
Айта кетейік, Есмігүл Құйылова бұған дейін де халықаралық аренада жүлдегер атанған. Дзюдошы қазан айында Жапониядағы Азия ойындарында қола медаль жеңіп алды.