"Бұл – оның таңдауы": Рахмоновтың бапкері Махачевтың шешімі туралы
DAR Team клубының бас бапкері Эдуард Базров ресейлік UFC чемпионы Ислам Махачевтың кәсіби мансабы туралы мәлімдемесіне қатысты пікірін айтты.
Базров Sports.kz басылымымен сұхбатында Махачев аралас жекпе-жекте өзінің жоғары деңгейін әлдеқашан дәлелдегенін айтты. Сондықтан мансабын жалғастыру немесе аяқтау туралы шешім тек файтердің өзіне тиесілі.
"Ислам барлығына өзін дәлелдеді. Ол – осы спорттың аңызы. Мансабын жалғастыра ма, әлде аяқтай ма – оны өзі шешеді. Махачев қол жеткізуге болатын барлық жетістікке жетті, UFC аңыздарының біріне айналды. Бірақ шынымды айтсам, оның кететіні туралы ойдың өзі аздап қынжылтады. Әлі де жекпе-жектерін тамашалағымыз келеді. Дегенмен мансабын аяқтаса, бұл – оның таңдауы", – деді Эдуард Базров.
30 қазанда Ислам Махачев әлеуметтік желідегі парақшасында кәсіби мансабының аяқталуы мүмкін екенін аңғартқан жазба жариялады. Ол X әлеуметтік желісінде келесі жекпе-жегі кәсіби мансабындағы соңғы кездесулердің бірі болуы мүмкін екенін мәлімдеді.
Бұған дейін ресейлік файтер бразилиялық Карлос Пратес пен эквадорлық Майкл Моралес арасындағы жекпе-жектің жеңімпазымен кездескісі келетінін айтқан еді.