Қазір бокстан ересектер құрамасы Алматы облысындағы олимпиадалық даярлау орталығында жаттығу жиынын өткізіп жатыр.
Бокстан ересектер құрамасы Алматы облысындағы олимпиадалық даярлау орталығында бас қосты. Бұл жолы командаға Геннадий Головкиннің физикалық даярлығына көмектескен Кристофер Камачо қосылды.
Америкалық маман Головкиннен бөлек, Хабиб Нурмагомедов, Кейн Веласкес, Даниэль Кормье, Люк Рокхолд, Брэндон Адамс секілді мықтыларды баптаған. Енді қазақстандық жігіттердің шеберлігін шыңдаумен айналысады.
Былғары қолғап шеберлері бірер апта бойы жалпы физикалық дайындықты пысықтайды. Одан кейін Астанаға жиналып, жауынгерлік әзірлік өткізбек. Бұл жаттығудың барлығы алдағы Азия чемпионатына бағытталған. Яғни, қазанның соңы мен қарашаның басында Иордания астанасы Амман қаласында ересектер арасындағы құрлықтық дода өтеді. Бұл Париж олимпиадасынан кейінгі ең ірі байрақты бәсеке. Осы жарыста біздің жігіттер олимпиадада кеткен есені қайтаруға тырысады.
