Өзбек боксшысы бүгін франциялық Давид Спильмонмен жұдырықтасуы керек-тін.
Екі дүркін Олимпиада чемпионы атағына ие өзбек боксшысы Баходир Жалоловтың кәсіпқой бокстағы жекпе-жегі өтпейтін болды. Жоспар бойынша бүгін ол Канаданың Монреаль қаласында өтетін бокс кешінде жұдырықтасуы керек-тін.
Өзбекстандық журналист Джалол Ахмедовтың айтуынша, Баходирден медициналық тексеріс кезінде герпес инфекциясы анықталып, нәтижесінде жекпе-жектен шеттетілген.
Баходир француз боксшысы Давид Спильмонмен (16-8-1, 11 КО) жұдырықтасуы керек болған.
Айта кетейік, Жалолов кәсіби бокста 14 жекпе-жек өткізіп, барлығын жеңіспен аяқтаған. Ол соңғы рет 2023 жылдың 17 қарашасында Ташкентте оңтүстікафрикалық Крис Томпсонды бірінші раундта нокаутпен жеңген еді. Одан кейін әуесқой боксқа ден қойып, Париж Олимпиадасында "алтын" алды.
Осыдан кейін өзбек боксшысы біржола кәсіпқой боксқа ауысты. Бұл оның асыға күткен жекпе-жегі болатын.
