Орта салмақтағы WBO және IBF тұжырымы бойынша әлем чемпионы Жәнібек Әлімханұлы алдағы жекпе-жекке қатысты өзбекстандық суперауыр салмақ боксшысы Баходир Джалоловтың мәлімдемесіне жауап берді.
Баходир Джалолов ресми түрде 5 сәуірде Астанада өтетін ауқымды бокс кеші – "Батырлар шайқасы" аясында рингке шығатынын мәлімдеді.
Қарсыласының есімі әзірге белгісіз. Бірақ спортшы қазақстандық жанкүйерлерге әлеуметтік желі арқылы үндеу жасады.
"5 сәуір. Астана. Жақында кездесеміз, Қазақстан!" – деп жазды Джалолов өзінің Instagram парақшасында, жекпе-жек афишасымен бөлісіп.
Өзбекстандық суперауыр салмақтағы боксшының бұл жазбасына қазақстандық чемпион Жәнібек Әлімханұлы жедел түрде пікір білдіріп, жылы лебізін жолдады.
"Біз сізді қарсы аламыз. Көп жеңіс тілейміз!" – деп жазды "Қазақ стилі" лақап атымен танымал Әлімханұлы.
5 сәуір күні өтетін бокс кешінің негізгі жекпе-жегі – Жәнібек Әлімханұлы мен француз боксшысы Анауэль Нгамиссенге арасындағы айқас болмақ.
