Қазақстандық боксшы Аида Әбікеева Сербияның Ниш қаласында өткен әйелдер арасындағы әлем чемпионатының финалында жеңіске жетті.
63 келіге дейінгі салмақ дәрежесінде өткен финалдық жекпе-жекте Әбікеева таиландтық Тананья Сомнуекпен кездесті. Қазақстандық спортшы 5:0 есебімен таза жеңіске жетіп, әлем чемпионы атанды.
Аида Әбікеева бұл жеңісі арқылы Қазақстан құрамасына үшінші алтын медаль сыйлады. Бұған дейін Назым Қызайбай (48 кг) мен Алуа Балқыбекова (50 кг) әлем чемпиондары атанды.
Тананья Сомнуек бұл турнирде күміс медаль еншіледі. Ол бұған дейін 2024 жылғы Азия чемпионатының қола жүлдегері атанып, 2022 жылғы Азия ойындарында да қола медаль жеңіп алған тәжірибелі спортшы.
