Өзбекстандық танымал боксшы, әлем чемпионы Шахрам Гиясов екі жасар қызының көз жұмғаны туралы жария етті.
Гиясов Instagram желісіндегі парақшасында жүрек тебірентерлік жазба қалдырып, қызының естелігіне арналған бейнежазбаны жариялады:
"Біз Аллаға тиесіліміз және ақыры соған ораламыз. Барлығы үшін Аллаға шүкір. Әрбіріміздің өмірде өз орнымыз бар – біреу ерте, біреу кеш кетеді. Қымбатты қызым, сен періштедей келіп, бізді Аллаға жақындаттың, тура жолға бағыттадың. Сенің орның енді белгіленді. Бізге сен сияқты таза өмір сүріп, сенмен қайта қауышу нәсіп болсын. Сенің шат күлкің мен балдай естеліктерің бізге өмір бойы рух береді. Біз сені және анаңды шексіз жақсы көреміз. Қайғымызға ортақтасқан барлық отандастарға алғысым шексіз", – деп жазды Гиясов.
Шахрам Гиясов – 2016 жылғы Рио-де-Жанейро Олимпиадасының күміс жүлдегері, 2017 жылғы әлем және Азия чемпионы. 69 келі салмақ дәрежесінде өнер көрсетіп, халықаралық аренада өзбек боксының атын асқақтатқан спортшылардың бірі.
