Әлемге әйгілі The Ring журналы WBO және IBF тұжырымдары бойынша орта салмақтағы әлем чемпионы Жәнібек Әлімханұлының беделі мен нарықтағы құнын арттырудың нақты жолын ұсынды. Басылым пікірінше, қазақстандық боксшы бұл мақсатқа тек мықты қарсыласты айқын жеңу арқылы жете алады.
The Ring Жәнібекке үлгі ретінде бірінші орта салмақтағы IBF тұжырымы бойынша әлем чемпионы, ресейлік Бахрам Муртазалиевті келтіреді. Ол 2023 жылы Германияда Джек Кулькаймен ауыр жекпе-жекте жеңіске жетіп, кейін жарақатына қарамастан, атышулы Тим Цзюді сенсациялық түрде ұтып, әлем назарын өзіне аударған болатын.
Жәнібек пен Бахрамның ортақ тұстары бар: екеуі де АҚШ-тың Калифорния штатында тұрады және менеджері — белгілі Эгис Климас. Осы себепті, The Ring сарапшыларының пайымдауынша, Жәнібек дәл осы Муртазалиевтің жолын ұстанып, мансабын жаңа деңгейге көтере алады.
5 сәуір күні Астанада “қазақ стилі” франциялық Анауэль Нгамиссенгемен рингке шығады. Бұл жекпе-жекте Нгамиссенге анық андердог саналып отыр. Бірақ The Ring сарапшылары бұл кездесуді Жәнібек үшін бетбұрыс сәт ретінде қарастырып, мықты қарсыластармен айқын әрі сенімді жеңістер қажет екенін айтады.
“Жәнібекке деген көзқарас өзгеруі мүмкін, егер Нгамиссенге немесе келесі қарсыласы нағыз бәсекелес бола алса. Муртазалиев сынды чемпиондардан шабыт алып, Әлімханұлы да мансап жолында айқын қадамдар жасауы қажет”, — деп жазады басылым.
