Фос-ду-Игуасу (Бразилия) қаласында World Boxing ұйымы ұйымдастырған бокстан Әлем кубогында Қазақстан құрамасы үшінші күннің жекпе-жектерінде төрт боксшысын жарысқа қосты
Ерлер арасындағы 55 келі салмақ дәрежесінде ел намысын қорғаған Нұрсұлтан Алтынбек Франция өкілі Билал Беналиді айқын басымдықпен (5:0) ұтып, жартылай финалға жолдама алды. Жекпе-жек барысында қазақстандық боксшы қарсыласынан барынша үстем болды. Дәл соққылар мен тактикалық артықшылық шешуші рөл атқарды.
70 келі салмақ дәрежесінде Дархан Дүйсебай да ширек финалға шыққан еді. Оның қарсыласы – тағы бір француз Макан Траоре болды. Тартысты өткен жекпе-жекте төрешілер шешімімен (1:4) жеңіс Траореге бұйырды. Бұл – Қазақстан құрамасы үшін үшінші күндегі жалғыз жеңіліс болды.
80 келіде сынға түскен Диас Молжігітов Польша өкілі Никодем Козакты еш мүмкіндік берместен 5:0 есебімен жеңді. Бұл жекпе-жекте Диас толық бақылауды қолына алып, тактикалық тұрғыда да, физикалық дайындық жағынан да қарсыласын басып озды.
Әйелдер арасындағы бәсекеде Жазира Орақбаева (51 кг) бразилиялық Каролин Алмедамен кездесіп, жанкүйерлердің жүйкесін жұқартқан жекпе-жекте 3:2 есебімен жеңіске жетті. Шешуші раундта Орақбаева басымдық танытып, жартылай финалға шықты.
