Десе де, өзбек боксшысы жақсы қаржы ұсынылса, кез келген боксшымен жұдырықтасуға дайын екенін айтып қалды.
Аса ауыр салмақта жұдырықтасатын өзбекстандық кәсіпқой боксшы Баходир Жалолов Иван Дычкомен кездесуге қатысты пікір білдірді. Оның айтуынша, бұл жекпе-жек қазірше өзекті емес.
Баходир Жалолов 5 сәуірде Астанада өтетін кәсіпқой бокс кешіне қатысады. Жекпе-жекте оның қарсыласы — украиналық Игорь Шевадзуцкий. Бұл кездесу аса ауыр салмақта өтеді.
Жанкүйерлер көптен бері Баходир Жалолов пен қазақстандық Иван Дычко арасындағы кәсіпқой жекпе-жекті асыға күтіп жүр. Алайда өзбекстандық боксшы бұл ұсынысқа қызықпайтынын айтты.
«Иван Дычкомен кездесу маған қызық емес. Оның өз жолы бар, менің өз жолым бар. Жоспарды тек менеджерлермен бірге ақылдасып құрамыз», – деді Жалолов.
Айта кетейік, әуесқой бокста бұл қос алып 4 рет кездесіп, барлығында Иван Дычко жеңіске жеткен еді.
