Ертең өзбекстандық аса ауыр салмақтағы кәсіпқой боксшы украиналық былғары қолғап шеберіне қарсы рингке шығады.
Америкалық Boxing247.com сайтының журналисі Майкл Коллинздің пікірінше, Жалолов алдағы уақытта кәсіби мансабындағы қарсыластардың деңгейін көтеруі қажет. Ертең Астанада өтетін жекпе-жек қарсаңында Майкл Коллинз өзбекстандық аса ауыр салмақтағы кәсіпқой боксшы, Олимпиада чемпионы Баходир Жалолов (14-0, 14 KO) жайлы осылай деді. Бұл туралы Sports.kz хабарлады.
Журналист Коллинз Жалоловтың мүмкіндіктеріне жоғары баға бергенімен, оның мансабындағы келесі қадамдар аса маңызды екенін атап өтті:
"Сенбі күні ESPN+ арнасында Жалоловтың кәсіпқой рингке оралуын көретін боламыз. Ол Олимпиада чемпионы, алайда кәсіби бокста белсенділігі төмен болып тұр. Өткен жылы Монреальдегі кеште өнер көрсетуі тиіс болғанымен, соңғы сәтте жекпе-жектен бас тартқан. Енді, міне, ол қайта оралды. Жалоловтың барлық қажетті қабілеті бар. Бірақ, енді қарымта шабуыл жасай алатын қарсыластармен кездесуі керек. Бұл жекпе-жек – соның алғашқы қадамы болуы тиіс", – деп жазады мақалада.
5 сәуір күні Астанада өтетін Жәнібек Әлімханұлы мен француз Анауэль Нгамиссенге арасындағы бокс кешінде "Үлкен өзбек" лақап атымен танымал Баходир Жалолов украиналық Игорь Шевадзуцкиймен (12-2, 10 KO) жұдырықтасады. Бұл Жалолов үшін 2023 жылдан бергі алғашқы жекпе-жек болмақ.
