Қазақстандық ауыр салмақтағы боксшы Даниал Сапарбай Бразилияның Фос-ду-Игуасу қаласында өткен World Boxing ұйымының әлем кубогы жартылай финалында өнер көрсетті.
Жартылай финалда Сапарбай өзбекстандық Джахонгир Зокировке қарсы тұрды. Бұл спортшыны мамандар екі дүркін Олимпиада чемпионы Баходир Джалоловтың ізбасары деп атайды. Екі алыптың кездесуі Зокировтың айқын басымдығымен аяқталды. Төрешілер бірауыздан 5:0 есебімен өзбек боксшысына жеңіс берді.
Осылайша Джахонгир Зокиров турнир финалына шығып, алтын медаль үшін таласады. Ал Даниал Сапарбай үшін бұл жарыс қола жүлдемен аяқталды.
Айта кетейік, Зокиров – 2021 жылғы жастар арасындағы әлем чемпионы, сондай-ақ U-22 санатында Азияның екі дүркін чемпионы. Ол қазір құрлықтағы ең мықты жас боксшылардың бірі саналады.
Бүкіл жекпе-жектің бейнежазбасын төмендегі сілтеме арқылы тамашалауға болады.
