Алайда оның қарсыласы - украиналық былғары қолғап шебері бұл рәсімде бой көрсетпеді.
Аса ауыр салмақта өнер көрсететін өзбекстандық боксшы Баходир Джалолов (14-0, 14 КО) ертең Астанада өтетін жекпе-жек алдында салмақ өлшеу рәсімінен сәтті өтті.
5 сәуір күні Астанадағы “Барыс Аренада” өтетін ауқымды бокс кешінің басты жекпе-жегі – WBO/IBF нұсқалары бойынша әлем чемпионы Жәнібек Әлімханұлы (16-0, 11 КО) мен француз Анауэль Нгамиссенге (14-0, 9 КО) арасындағы кездесу болмақ.
Сол кеште рингке шығатын боксшылардың бірі – “Үлкен өзбек” атанған Баходир Джалолов. Оның қарсыласы – украиналық Игорь Шевадзуцкий (12-2, 10 КО).
Жалолов ресми салмақ өлшеу рәсіміне толықтай қатысып, салмақ талаптарын орындаған. Алайда оның қарсыласы Игорь Шевадзуцкий салмақ өлшеу рәсімінде бой көрсетпеді. Соған қарамастан, ұйымдастырушылар жекпе-жек ертең өтеді деп сендірді.
Баходир Джалолов соңғы рет кәсіпқой рингке 2023 жылдың қарашасында шыққан. Ол кезде Оңтүстік Африка Республикасының өкілі Крис Томпсонды (14-6-1, 7 КО) бірінші раундта-ақ нокаутпен жеңіп шыққан еді.
Ал 2024 жылдың жазында, Париж Олимпиадасында, Джалолов өзінің екінші алтын жүлдесін жеңіп алып, екі дүркін Олимпиада чемпионы атанды. Осы жетістіктен кейін ол толықтай кәсіби боксқа ден қоятынын мәлімдеген болатын.
